پاکستان کو جیت کے لیے پانچ سو دس رنز کا ہدف

Posted by on Jun 24, 2012 | Comments Off on پاکستان کو جیت کے لیے پانچ سو دس رنز کا ہدف

سری لنکا کے شہر گال میں کھیلے جانے والے پہلے ٹیسٹ میچ کے تیسرے دن سری لنکن ٹیم کی پوزیشن نہایت مضبوط ہے اور اس نے پاکستان کو جیت کے لیے پانچ سو دس رنز کا ہدف دیا ہے۔

پہلی اننگز میں پاکستان پر تین سو بہتّر رنز کی سبقت حاصل کرنے کے بعد دوسری اننگز میں سری لنکن بلے بازوں تلکارتنے دلشان اور پرناویتانا نے پراعتماد انداز میں کھیلتے ہوئے سری لنکا کی برتری میں مزید پچاسی رنز کا اضافہ کیا۔

دوسری اننگز میں پاکستان کو پہلی کامیابی سعید اجمل نے پرناویتانا اور دوسری جنید خان نے دلشان کو آؤٹ کر کے دلوائی۔ پرناویتانا نے پچیس جبکہ دلشان نے چھپن رنز بنائے۔

اس سے قبل تیسرے دن کھانے کے وقفے سے قبل پاکستان کی پوری ٹیم اپنی پہلی اننگز میں ایک سو رنز بنا کر آؤٹ ہوگئی۔ تاہم میزبان ٹیم نے پاکستان کو فالو آن پر مجبور نہ کرنے کا فیصلہ کرتے ہوئے خود کھیلنے کا فیصلہ کیا ہے۔

پاکستان کو تیسری کامیابی چائے کے وقفے سے پہلے ملی جب پہلی اننگز میں ایک سو ننانوے رنز کی شاندار اننگز کھیلنے والے کمارا سنگاکارا صرف ایک رن بنا کر سعید اجمل کی دوسری وکٹ بنے۔

یہ ٹیسٹ کرکٹ میں سری لنکا کے خلاف پاکستان کا دوسرا سب سے کم مجموعہ ہے اور آٹھ پاکستانی بلے بازوں کا سکور دوہرے ہندسوں میں بھی داخل نہ ہو سکا۔

ہیراتھ نے یونس خان کی اہم وکٹ بھی حاصل کی

تیسرے دن جب کھیل شروع ہوا تو یونس خان اور اپنا پہلا ٹیسٹ کھیلنے والے محمد ایوب ڈوگر نے اڑتالیس رنز پانچ کھلاڑی آؤٹ کے سکور سے اننگز دوبارہ شروع کی۔

پاکستان کو چھٹا نقصان پینسٹھ کے مجموعی سکور پر یونس خان کی وکٹ کی صورت میں اٹھانا پڑا جنہیں ہیراتھ نے انتیس کے انفرادی سکور پر ایل بی ڈبلیو کر دیا۔

بعد میں آنے والے پاکستانی بلے باز ابتدائی بلے بازوں کی طرح ناکام رہے اور پوری ٹیم پچپن ویں اوور میں سو رنز پر پویلین لوٹ گئی۔

سری لنکا کی جانب سے سورج راندیو نے چار، ہیراتھ نے تین جبکہ کلاسیکرا نے دو کھلاڑیوں کو آؤٹ کیا۔

Advertisement

Subscription

You can subscribe by e-mail to receive news updates and breaking stories.

————————Important———————–

Enter Analytics/Stat Tracking Code Here